Min het ons geweet dat die Duiwel ons nie graag daar wou hê nie, en kon ons na ure se gespook met die bedrading van die sleepwaentjie, eers 8h00 die pad aandurf (± 560 Kilometer). Sowat 20km vanaf die plaas af, bars daar toe sowaar ‘n wiel van die sleepwaentjie en moes ons in die gevaar van baie stof en honderde voertuie op dieselfde pad die wieletjie omruil. (Selfs die pad terug huistoe was ook nie sonder sy probleme nie, die sleepwaentjie het nog ‘n probleem-wiel opgelewer en die Land Rover se koppelaar het ook moeilikheid gegee).
Goed, uiteindelik was ons daar, maar mense wat ‘n ervaring, ek sal die gesig nooit vergeet nie! Ek het in my hele lewe nog nooit soveel duisende der duisende mense (almal mans) en duisende voertuie en duisende tente by mekaar gesien nie! Ons het gehoor dat daar ook mense vanaf oral oor die hele wêreld teenwoordig was. Ek was ook verskriklik beïndruk met die gehalte van die klank en beeld-toerusting sommer netso daar in die veld! Daar was ‘n netjiese verhoog opgerig, met duisende en duisende bale voer wat gedien het as sitplekke (dit was nogtans ook hopeloos te min). Daar was 7 beeldskerms wat wydverspreid was (seker maklik 100m uit- mekaar) wat dit vir almal maklik gemaak het om alles te kon aanskou. Die skerms was almal masief-groot waarvan net een skerm meer as 2.5 miljoen LED’s bevat het. Mense hiedie skerms het net met een-woord ‘n fantastiese beeld. Daar was ook ‘n aparte skerm tot diens van die dowes. Die klank stelselsels het my verder in verwondering gelaat, ‘n mens kon nie glo dat jy in die ope-lig sulke klank gehalte kon verkry nie!
Dan begin die duisende manne saampak vir die Vrydagmiddag -aand se eerste sessie, die sangers was uitstekend. Die atmosfeer wat daar geheers het was onverklaarbaar. Jy voel hoe hoe jou hele liggaam hoendervleis word. Net om te kan deel-uitmaak van soveel mense (manne) wat almal net een doel voor oë het en dit is om jou eie afspraak met GOD na te kom, ‘n afspraak tussen honderde duisende manne maar dit bly nogtans ‘n dialoog tussen slegs jy en jou HERE alleen. Dan hoor jy weer die gebulder wanneer al daardie duisende mans en seuns se basstemme “amen” uitroep en die klank vir kilometers ver oor al die rante en klowe dra.
Elke keer wanneer oom Angus op die verhoog verskyn besef ‘n mens dadelik dat GOD hierdie gewone omie met sy hoed en ook altyd met sy Bybel in sy hand, tot die uiterste vir HOMSELF gebruik om mense-harte aan te raak. Hy het die vermoë om op ‘n eenvoudige dog praktiese manier vir GOD direk in jou hart in te lei! Ek dink dat die HERE juis vir oom Angus as werktuig gebruik omdat hy so opreg en so eerlik en op almal se vlak op die man-af met jou kan praat. Vir ‘n oomblik het ek daaraan gedink hoeveel kritiek daar ook elke jaar na so ‘n Mighty Men kan wees en het gewonder hoekom dan so . . . ek het my eie gedagtes maar net dadelik gesmoor deur vir myself te sê dat dit moontlik jaloesie, of dalk maar ‘n teen-aanval van die Duiwel kan wees.
Op daardie stadium was die weer druigend en het almal gevrees dat die sluise enige oomblik kan oopgaan en dit kon katastrofies wees! Oom Angus het ewe kalm die mense die versekering gegee dat dit nie sal reën voor die aand se verrigtinge afgehandel is nie, mense sê mos hy dink hy is die “weatherman” maar nee hy is eintlik die “Weatherman” se seun. Hy het reeds vir 5 dae gebid en die HERE gevra dat dit nie moet reën nie. Getrou aan GOD se belofte het die weer presies nadat die aand se verrigtinge afgehandel was eers uitgesak. Hierdie was vir my persoonlik die grootste openbaring en kry ek nou nog ‘n knop in die keel as ek daaraan dink. Nog was dit nie die einde nie, dit het daardie hele nag gereën en het die mis swaar oor die duisende tentjies gehang. Die volgende oggend toe ons weer ons plekke inneem het die weer reeds regoor die gebied van daardie plaas oopgetrek en het die son heerlik warm oor die plaas geskyn met wolke regrondom daardie spesifieke gebied. Nee my vriend en vriendin dit was nie toeval nie dit kan ek uit my eie hart getuig.
Ek het deurentyd gesien hoe geharde-manne hier oral om my verkrummel en in trane vir die eerste-keer tot die besef kom dat hy nog nooit werklik vir GOD in sy lewe gehad het nie. Ander was sy lewe lank soekende, net om dan skielik vir GOD te ontdek. ‘n Mens kan nie hierdie dinge verklaar nie of selfs nie eers mooi beskryf nie. Hier binne jou kan jy voel dat jy die regte tyd op die regte plek is en dat jy dit vir niks in die wêreld sal wil verruil nie. Jy sien hoe almal om jou begeesterd is en net spontaan aan alles deelneem.
Ek was ook in verwondering om te aanskou wat daar tussen en in die duisende tente en voertuie gebeur het. Dit was asof daardie duisende mans almal vir die hele naweek deur die Heilige Gees vervul was, dink maar self, dit is mos nie normaal nie, oral kon jy sien hoe mense om en onder hulle tentjies in hul groepies sit en bid of Bybellees. Manne staan en gewydeliedjies sing, dit terwyl hulle kosmaak of hulleself was of wat ookal. Jy sien hoe manne met ‘n groot “banner” hoog bo-kant sy kop loop, met die woorde “I love JESUS” daarop, en dan doelbewus vorentoe stap sodat al die duisende ander mans dit kan aanskou! Daar is fout as iemand nie deur so ‘n gesig aangeraak voel nie.
Na die naweek se ervarings en weer oppad huistoe, het ons aanhoudend oor die afgelope Mighty Men en die afgelope gebeure gepraat, en was dit wonderlik om te kon hoor dat almal van ons geweldig verryk gevoel het en dat elkeen van ons ‘n eie ervaring en ‘n persoonlike ontmoeting elk op sy eie manier, met GOD gehad het.
Die 3 grootste motiverings-lesse wat ons ontvang het (daaroor het ons saamgestem) was die volgende:
1) Ons as manne moet nou teruggaan met die verantwoordelikheid om weer leiding te begin neem in ons eie huise, werksplekke en vriendekringe en om GOD se Almag te erken en te bely en daarvolgens te lewe. Ons kan en sal bydra om Suid-Afrika weer heel te maak.
2) Ons moet dit wat tussen elkeen van ons en ons HERE staan gaan regmaak en dan daarvandaan net vorentoe beweeg sonder om ooit weer om te kyk!
3) “What a man is, so he sees” deur positief en gemotiveerd op te tree sal jou totale uitkyk op die lewe verander.
Dankie HERE dat U slegs deur U Genade weer so naby aan so baie mense gekom het en bravo aan Angus Buchan en al die Mighty Men (of jy nou in Greytown was of nie), ons sal soos wat GOD van ons verwag, weer van Suid-Afrika ‘n waardige tuiste vir almal maak!
Posts
No comments:
Post a Comment